嗰道門，冇開到（上）
愛情，嚟得突然，往往喺你冇準備嘅時候出現，
亦往往以你無法預料嘅方式去結束。
初初識到阿峰嗰陣，我以為，佢會係我嘅真命天子。
一切好似係緣份嘅安排，我哋來自同一個國家，同樣去咗日本留學，喺同一間大學讀Master。
雖然我哋讀嘅科唔同，但我哋嘅研究室就喺附近，日日返學都會見到。
阿峰斯文有禮，完全係我鍾意嘅類型。
係邊個表白先？根本唔需要表白。
當一個人鍾意你，從佢灼熱嘅眼神、微紅嘅面龐，你已經會感受到佢嘅愛意。
所以，當兩個人都有意思，就會順理成章咁喺埋一齊。
愛情，就係咁簡單。
一對身處異國嘅情人，感情發展得飛快。
拍拖兩個月，我哋就打算同居，反正大家都要租屋住，一齊住仲可以慳啲錢。
我嘅好姐妹歌歌有阻止過我，佢話覺得咁快就同居，仲未睇清楚一個人，唔係太好。
我嗤之以鼻：「依加咩年代？阿峰咩都講晒畀我知啦，連銀行密碼都畀埋我，雖然佢戶口冇乜錢。」
「但我覺得，阿峰個人有啲古怪，佢嘅眼神好似……好執著咁。」歌歌皺眉。
「我就係鍾意佢好執著咁望住我，好似我就係佢嘅全世界咁！」
當一個女人，堅持要同一個男人同居，世上就冇佢跳唔過嘅圍牆、冇佢拋唔低嘅顧慮，亦冇攔得住佢嘅上帝。
於是，我同阿峰開始同居。
初時係好甜蜜，但冇幾耐，其實都唔夠一個月，我就開始發現阿峰嘅問題。
佢係一個好執著嘅人，所有事都想證明自己係啱，小至睇一套戲、食一餐飯，佢都會堅持佢嘅諗法，我一旦拒絕，就必定會嘈交。
最令我難受嘅係，嘈到最後，我唔想理佢、想冷戰嘅時候，阿峰唔會嘗試哄我。
佢只會用陰鬱嘅眼神望住我，唔出聲，好似背後靈一樣，真係幾恐怖。
同居兩個月，我又同阿峰嘈交。
呢次係阿峰話：「夜啦，要瞓覺啦。」
我拎住手機，唔想瞓，仲想玩多陣，就話：「你瞓先啦。」
點知，阿峰用力抓住我隻手，死死睥住我：「我話要你瞓覺啊！」
一陣寒意湧上心頭，呢一刻，我真係覺得阿峰會殺咗我。
「你痴線㗎？」我甩開佢隻手，就推門跑咗出去。
阿峰追上嚟，我一路跑一路叫「救命」，鄰居都開門睇發生咩事。
但阿峰完全唔在意鄰居嘅目光，伸手就抓住我、搶我部手機。
最後，鄰居威脅要報警，我先走得甩。
我喺日本舉目無親，只有歌歌一個好姐妹。
於是，我去咗歌歌屋企瞓，歌歌叫我暫時住喺佢屋企先，等租到新屋再搬出去。
但跟住落嚟嘅日子，我根本冇心機諗租新屋嘅事。
因為阿峰唔接受分手嘅現實，不斷糾纏我，佢打畀我、喺學校搵我，佢仲知道歌歌住邊，成日喺樓下等我。
我好後悔，點解當時冇聽歌歌嘅勸告。
歌歌反而安慰我：「嗰陣我都估唔到阿峰會咁癲，不過，佢始終會放棄嘅。」
下集：https://bit.ly/2YPUXHn
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #嗰道門冇開到
Search